Magkakaigwa na nin pre-audit sa mga road projects kan Department of Public Works and Highways (DPWH) nganing maaraman kun kaipuhan na irahayon o dai an sarong tinampo.
Sa pagbusisi sa propwestong pondo kan ahensya para sa 2026, sinabi ni DPWH Secretary Vince Dizon na imbes na post-audit sana, magkakaigwa na man nin pre-audit nganing malikayan an duplication, o an pagkakapondohan kan parehong proyekto nin duwang beses o labi pa, maski pareho sana an lokasyon, obheto, o sakop kan trabaho.
Natuyaw kaya ni Senator Erwin Tulfo na nagigin kawsa kan duplication an pauro-utrong pagbungkal kan tinampo maski katatapos pa sana kan proyekto.
Kalimitan suboot ini sa Region 5 sa Bicol, partikular sa highway poon Quezon pasiring sa Camarines Sur, kun saen pirmi suboot na raot an tinampo.
Paliwanag ni Dizon, haloy nang inirereklamo an reblocking, kun kaya kan Oktubre 7 an nagpaluwas siya nin memorandum na nagsususpender nationwide kan gabos na reblocking activities hangga’t dae naipapaluwas an malinaw na guideline asin criteria kun nuarin dapat mag-reblock.
Posible suboot na sa mga masunod na semana an matatapos nang mabilog an mga giya kun nuarin puwedeng mag-reblock.
Kompyansa man si Tulfo sa plano kan kagawaran, huli ta garing nagin “common practice” na kan nakalihis na administrasyon sa DPWH an pagpapakarhay kan mga tinampo maski na maray pa an mga ini.
 to determine whether a road needs to be repaired or not.){kind=link}