LEGAZPI CITY – Kinumpirmar kan Albay Power and Energy Corporation (APEC) na naputulan nin suplay nin kuryente an Brgy. Alcala sa banwaan kan Daraga, Albay huli sa nasa P9 million na kabilugang kantidad na dapat bayadan.
Sa intrevista kan Bombo Radyo Legazpi ki APEC spokesperson Pat Gutierrez, ipig-eksplikar kaini na puon pa taong 2018 an nagin pag-oolay ninda kan mga opisyales kan Barangay Power Association (BAPA) tangarig na ma-settle an current asin arrears kan barangay.
Puon man kan Pebrero kan presenteng taon mismong an general manager kan APEC an nakipaghampang sa BAPA sa bayadan hasta sa maglatag nin nagkapirang kondisyones tangarig na ma-reconnect an power supply.
Nag-uyon an APEC officials na magdeposito muna para arrears na labi sa P8 million asin installment para sa current na labi man sa P500, 000.
Alagad sa ibong kaini segun ki Gutierrez, nagpalyar man giraray an BAPA na bayadan an pighahagad na kantidad hasta sa mabuwag an mismong organisasyon kan BAPA.
Bako man klarado kun nata dae nakapagbayad an barangay kan nasabing kantidad. Paliwanag pa kan opisyal, warang kopya kan individual billing an APEC huli ta solamenteng sa ‘mother meter’ nagi-evaluar kan gamit sa kuryente.
Mientras tanto, pig-engganyar man ni Gutierrez an mga opisyal kan BAPA na magbalik sa negotiating table tangarig na mapag-olayan an isyu asin an mode kan pagbayad.
