Papaimbestigaran ni Philippine National Police Chief Police General Rommel Francisco Marbil an mga naging pahayag ni Police Lieutenant Col. Jovie Espenido dapit sa pigtataram na pagkakaiwa nin quota asin reward system sa panahon kan kampanya kontra droga kan PNP, kaibanan na an Oplan Double Barrel na pigpaotob durante kan administrasyong Duterte.
Pigduon ni Marbil na magabat an mga akusasyon na ini na nagkawsa nin dakulang pagkahadit sa publiko.
An review panel, na pinamamayuhan kan Office of the Deputy Chief PNP for Operations (ODCO) asin kumpwesto kan PNP Quad Staff, Internal Affairs Service asin Human Rights Office, an pigsugo na pag-adalan asin i-evaluate an Oplan Double Barrel, kaibanan an mga pahayag ni Espenido.
Kaibanan sa mga iimbestigaran an gabos na aspeto sa kampanya kontra iligal na droga, partikular na an dapit sa diretsos humanos, operational protocols, asin accountability mechanism.
