LEGAZPI CITY- Nagpadara na nin mga imbestigador si PNP Chief Ronald “Bato” Dela Rosa sa probinsya kan Catanduanes.
Ini ngani na imbestigaran an nadiskubreng mega shabu lab sa barangay Palta Small, Virac sa nasambitan na probinsya kun sain pigkokonekta an nagkapirang mga opisyal.
Katakod kaini, sinierto ninda DILG Secretary Catalino asin kan PNP chief na malalaoman kan mga namamanwa an marikas asin patas na imbestigasyon kan Philippine National Police (PNP) dapit sa nasambitan na kaso.
Obheto suboot kan pagpapadara nin imbestigador an matutukan an imbestigasyon ngani na mapanimbag an mga nasa likod kan pagkakatugdok kan shabu laboratory.
Napag-araman na maghahali pa an mga ini sa Directorate for Investigation and Detective Management (DIDM) asin Criminal Investigation and Detection Group (CIDG) kan PNP.
