LEGAZPI CITY- Nadidifisilan ngunyan an Masbate Police Provincial Office na makabilog nin makusog na anggulo sa motibo sa pagadan sa journalist na si Joaquin “Dos por dos” Briones Jr.
Sa intrevista kan Bombo Radyo Legazpi ki PS/Supt. Froilan Elopre, Masbate PNP Provcincial Director, ipiglatag kaini an nagkapira sa mga anggulo na saindang pigtututukan kaibanan na an propesyon kaini bilang hard-hitting commentator asin writer sa sarong tabloid, pagiging cop fighting breeder, financer sa small-scale mining, personal na buhay siring man an minsan na kaining pagdalagan sa politika bilang bise-alkalde sa banwaan kan Milagros, Masbate.
Marurumduman na enot na man na pighayag kan tugang kaining si Rey Briones na editor in-chief asin publisher sa sarong dyaryo na warang koneksyon sa propesyon an pagadan sa saiyang tugang.
Mientrastanto, nagpapadagos man ngunyan an ipigkokundusir na profiling sa mga posibleng testigo asin suspek kun sain an warang plaka sanang motorsiklo an palatanaan sa mga ini na ginamit na getaway vehicle.
Sa presente nasa crime lab man giraray an mga balang nakua hali sa hawak kan journalist asin isasairarom pa sa ballistic examination.
Nagpromesa man si Elopre nin full support sa pamilya kan biktima sa tulos na ikakaresolbar kan kaso kun sain personal pang nagbisita an opisyal sa lamay ni Briones.
