LEGAZPI CITY — Nasa Albay ngunyan si PISTON national president George San Mateo para sa nakatalaan na Regional Forum sa aga kan mga transport leader sa Bicol region.
Sa intrevista kan Bombo Radyo Legazpi sa opisyal, obheto kan saindang aktibidad na mapagkasararo an lado kan transportasyon sa pagpapakusog kan laban kontra sa isyu kan jeepney modernization.
Dugang pa kaini na mawot man nindang mapakusog an kampanya sa pangapudan na pagsusupinde kan Tax Reform for Acceleration and Inclusion (TRAIN) Law na labing nakaka apektar sa paglangkaw kan presyo kan mga pangenot na babarakalon partikular na an petrolyo.
Pag-istorya ni San Mateo, magkakaigwa sinda nin mga resolusyon kaibanan na an pagkontra sa cash voucher.
Marurumduman na nagpromesa an gobierno na ipapanao an subsidiya para sa mga driver ngunyan na Hulyo alagad hasta sa ngunyan dae pa nagpapaluwas nin Implementing Rules and Regulations (IRR) para sa programa.
Napag-araman man na hali sa orihinal na plano na pagtatao kan gobierno nin nasa P26,000 kada taon, buminaba ini sa P5,000 sa laog nin anom na bulan.
Kontra man an PISTON sa plano kan gobierno na ipaagi sa mga operator an cash subsidy ta wara suboot kasiertuhan na maipapaabot ini sa mga driver na iyo an urualdaw na nagdidifisilan sa pagbakal nin petrolyo.
Suhestyon pa kan opisyal na ibase na sana sa kada behikulo an nasambitan na cash transfer.
