Sarong Filipina nurse practitioner an nahahampang sa manlain lain na federal charges sa Estados Unidos makalihis akusaran nin sarong mahewasan na fraud scheme na suboot nakapandaya sa Medicare asin TRICARE nin haros US$1 bilyon o pigkakarkulong P51.6 bilyon.
Binisto an suspek na si Marizel Yukee, residente kan Las Vegas, na inisyuhan nin warrant of arrest kan United States District Court for the Southern District of Texas.
Kinasuhan ini nin conspiracy to commit healthcare fraud asin wire fraud, healthcare fraud, conspiracy to pay and receive illegal kickbacks, asin money laundering.
Segun sa mga federal prosecutor, target suboot kan operasyon an mga may edad na asin mga pasyanteng igwang malubhang kamatean sa paagi kan pagtatao nin dae kinakaipuhan na wound treatments, na pagkatapos an pigsisingil sa mga government health programs.
Pigkokonektar si Yukee sa operasyon kan apat na wound-care clinics sa Texas, Nevada, California, asin Hawaii, kun sain nagbabayad suboot nin ilegal na kickbacks karibay kan patient referrals.
Basado sa imbestigasyon, pigpepeke suboot an medical records kan mga pasyente asin naniningil para sa mga serbisyong dae man kinakaipuhan, mantang nakakaresibe nin milyon-milyong dolyar na kickbacks.
Segun pa sa mga prosecutors, pigagamit suboot an mga nakuwang kwarta sa luho asin mga mamahalin na ari-arian, kaibanan an Ferrari supercar na nagkakantidad nin labi sa $500,000, mga alahas, sarong harong sa Hawaii na pigkakarkulong nasa $1 million, asin sarong beach resort project sa Santa Ana, Cagayan sa Pilipinas na uminabot sa US$4.6 million.
