LEGAZPI CITY-Nairehistro an pinakahalangkaw na sulfur dioxide emission na nasa 6, 197 sa Bulkang Mayon kan Enero 20, 2026 susog sa datos kan Philippine Institue of Volcanology and Seismology (Phivolcs).
Segun kay Mayon Observatory Resident Volcanologist Doreen Abelinde sa intrevista kan Bombo Radyo Legazpi na nagabot sa 6,947 tons per day an nai-record na sulfur dioxide emission.
Sinabi pa niya na ini an pinakahalangkaw na record ngonian na eruption kan Mayon asin sa mga nakalihis na taon.
Sa presente uminabot na sa 1, 150 tonelada kan Sulfur Dioxide an nairehistro asin padagos na mahihiling an banaag o crater glow sa Bulkan.
Basado sa huring datos kan ahensya, nakapagrehistro nin 1 volcanic earthquake, 375 Rockfall asin 9 pyroclasstic density current signals o “Uson” sa nakalihis na magdamlag ngonian na aldaw.
Padagos man an magmatic unrest kan Bulkan kun sain nagabot na an lava flow sa parte kan Basud gully sa 3.8 km, nasa 2.1 km sa Bonga gullly asin 1.3 km sa Mi-isi gully.
Dagdag pa ni Abelinde na an rason kan pagsakat kan magma, iyo an posibleng efficient na degassing kaini.
Pagirumdom kan ahensya na likayan an paglaog sa 6km permanent danger zone, mag-ingat sa rockfall, landslide, o lava flow sa dalisdis kan Bulkang Mayon.
Posible man liwat na magkaigwa nin weak to moderate na explosion an Bulkang Mayon maski pa nagtetenir ining effusive.
Pigpapatanidan man liwat an publiko mapadapit sa banta kan ashfall, ash emission, asin emplaced ash sa dalisdis kaini na pwedisir madara kan makukusog na paros, siring man an peligro kan lahar flow enkaso igwang pag-uuran sa provincia.
