Maabot sa P60 milyon an pighahagad na bayad danyos kan Pilipinas hali sa China huli sa nangyaring insidente sa Ayungin shoal kan Hunyo 17.
Segun kay Armed Forces of the Philippines Chief Gen. Romeo Brawner Jr., ipinadara niya na an pormal na reklamo sa Department of National Defense asin Department of Foreign Affairs na iyo an makikipagkoordinar sa gobyerno kan China.
Hali an nasabing kantidad sa duwang inflatable boats asin duwang rubber boats kan Philippine Navy na rinaot kan China Coast Guard.
Kasabay naman digdi an mga communication devices, navigation equipments asin makina na naraot kan mga Chinese, siring man an cellphone asin pitong highpowered firearms na hinabon.
Pinag-aadalan pa kan Armed Forces of the Philippines an pagsasangat nin reklamo nganing singilon an China sa mga gastos sa pagpapabulong sa sarong navy personnel na naputolan nin guramoy sa insidente.
Magigirumduman na enot naman na ipinagsugo ni Presidente Ferdinand “Bongbong” Marcos Jr. sa Armed Forces of the Philippines na makipagdayologo sa China asin pahupaon an tensyon sa West Philippine Sea.
