LEGAZPI CITY- Target kan Kamara na mapunan na an plenary debate para sa pigbubusol na economic Charter Change sa bulan nin Pebrero.
Sa intrevista kan Bombo Radyo Legazpi kay Ako Bicol Partylist Rep. Alfredo Garbin Jr., sa ngunyan pigtatapos na sana an iba pang mga diskusyon sa bill sa comittee level ngani na maisalang na sa pagdangog.
Kumpiyansa an opisyal na bastante na an panahon ngani na maipasar asin maging ley an resolusyon antes an nakatalaan na eleksyon sa taong 2022 kung sain magriribay na naman nin Kongreso.
Segun kay Garbin, napapanahon naman nganing magkaigwa nin Cha-Cha sa nasyun na pinaglalaomang makakatabang sa liwat na pagpapakusog kan ekonomiya na labing naapektaran kan coronavirus disease pandemic.
En kaso kayang maipasar ini papaluwagon an mga restrictions sa pagnenegosyo sa nasyun ngani na makaengganyar nin dakol na mga investors para sa mas dakol na negosyo na magtatao man nin trabaho sa mga Pilipino.
Naglalaom man an Kongresista na huli digdi dae na mapipiritan pa an mga Pilipino na magpasiring sa ibang nasyun ngani sanang makahanap nin trabaho.
