LEGAZPI CITY- Sinierto kan Philippine Institute of Volcanology and Seismology na an pigbabantayan na volcanic hazards an dae man nakaka abot sa extended danger zones kan bulkang Mayon.
Ini an katakod kan padagos na nairerehistrong lava flow, pyroclastic density currents o uson asin rockfall.
Segun ki Mayon Observatory Resident Volcanologist Doreen Abelinde sa intrevista kan Bombo Radyo Legazpi na dae man ini nakaka abot sa extended danger zone kun sain nagtetenir an publiko.
Basado man sa datos, nahiling na an pinakahalabang inabot kan lava flow an nairehistro sa Basud gully na nasa 3.41 km mantang sa Bonga asin Mi-si gully man an anas igwang nasa 1.34 km na lava flow.
Sa ibong kan mga parametrong pigbabantayan, sinabi ni Abelinde na wara pa man na nahihiling na rason ngani na itaas an alerto kan bulkang Mayon na presenteg nasa alert level 3 na.
Nagpagirumdom man an opisyal sa publiko na ibitaran an paglaog sa 6km radius permanent danger zone ngani na maibitaran an anuman na aksidente.
