LEGAZPI CITY- Nagpagirumdom an Philippine Institute of Volcanology and Seismology (PHIVOLCS) sa mga lokal na turista asin iba pang naglalaog sa permanent danger zone kan Bulkang Mayon na mantenido an peligro.
Nakataas pa man giraray sa Alert Level 1 an nasabing bulkan na nangangahulugan na nasa abnormal na kondisyon pa ini.
Sa intrevista kan Bombo Radyo Legazpi ki PHIVOLCS volcanologist Paul Alanis, nakaalerto man an ahensya asin padagos an monitoring alagad nasasabutan man an economic asin tourism activities na konektado sa Mayon.
Pakiolay sana na kun pwedeng maibitaran, dai na sana maglaog o kaya dai maghaloy sa PDZ.
Ipighahadit sana ni Alanis an posibilidad na magkaigwa nin insidente na may kinaaraman sa bulkan.
Yaon pa an lava dome na kun may makusog na paghiro an posible man na matipak asin magpababa sa uson.
Sa mga nagdadayo pa sa Albay, pakiolay kaining hangaan na sana an gayon kan bulkan maski sa harayong distansya para salbado man sa peligro.
