Nagpatanid an Philippine Space Agency (PhilSA) dapit sa posibilidad na pagbagsak sa kan debris kan ipiglansar kan China na Long March 7A rocket sa exclusive economic zone asin archipelagic waters kan Pilipinas.
Sa abiso kan ahensya, nagpatanid ini na posibleng bumagsak an debris sa drop zones, sa pigkakarkulong 41 nautical miles (NM) hali sa Burgos, Ilocos Norte asin 62 NM sa Dalupiri Island, Cagayan siring man sa 69 NM hali sa Santa Ana, Cagayan asin 81 NM hali sa Camiguin Norte.
Alagad dae pinaglalaoman na mahugpa ini sa kadagaan o mga kaharungan, an nasabing rocket debris an pinagkakahaditan na magkawsa nin peligro sa mga naglalayag na barko, aircraft, bangkang pangsira asin iba pang behikulong pandagat na naga-agi sa nasabing mga drop zones.
Segun sa PhilSA, ipiglansar an nasabing rocket hali sa Wenchang, Hainan bandang alas-12:16 nin maagahon ngunyan na aldaw nin Miyerkules, Mayo 27.
Inenganyar man kan ahensya an publiko na ipagtaong aram sa mga otoridad kun enkasong mamataan an pinagtutubudan na debris.
Pinaglilikay man an publiko asin inabisuhan na dae ini pagranihan o i-retrive huli ta posibleng igwang nakalalasong substance siring kan rocket fuel.
