LEGAZPI CITY- Mawot kan nagkapirang grupo na matawan nin linaw kun ano an basehan kan Department of Agriculture kun nata nataram na posibleng magkaigwa nin kakulangan nin suplay nin bunay sa bulan nin Abril.
Marurumduman na enot na sinabi kan ahensya na plano ninda na mag-angkat nin hatching eggs ngani na mapunuan an suplay.
Segun ki Philippine Egg Board Association President Francis Uyehara sa intrevista kan Bombo Radyo Legazpi na basado sa saindang kalkulasyon, stable man an suplay kan bunay sa Pilipinas.
Paliwanag kaini na mas dakol pa an suplay kan bunay ngunyan kumparar kan nakalihis na taon kaya warang basehan an pahayag kan ahensya.
Ipigkakahadit kan grupo na an salang projection kan Department of Agriculture an magresulta sa pagsasamantala asin pagpapalangkaw kan presyo sa bunay.
Dugang pa ni Uyehara na an hatching eggs sa layer industry an planong i-angkat kan ahensya maski pa an broiler industry an nangangaipo nin hatching eggs.
Enkaso suboot na magkakaigwa nin sobra-sobrang mga nagbubunay na manok, posibleng magresulta ini sa pagbagsak kan presyo kan bunay o pagbabawas nin mga ataman na manok na magreresulta sa pagkalugi kan mga lokal na na industriya.
