Nangapodan nin hustisya an Philippine Air Force (PAF) sa pagkagadan ni SEA Games gold medalist Mervin Guarte.
Si Guarte an sarong Airman First Class na nagbale sa PAF sa paagi kan direct enlistment kan 2015.
Segun sa PAF, mawot ninda an hustisya sa pagkagadan kan national athlete na pirang beses nang nagtaong honra sa Pilipinas asin sa air force sa paagi kan manlain-laing international competition.
Pigsyerto man kan PAF an kahandaan kaining makipagtabangan sa Philippine National Police (PNP) para sa imbestigasyon asin dagos na pagtataong-hustisya kay Guarte.
Inapod kan hukbo an batikang atleta bilang ‘accomplished’ soldier athlete asin na may disiplina, dedikasyon, asin commitment sa saiyang trabaho.
Kan Enero 7 kan pinagsasaksak si Guarte sa Calapan City, Oriental Mindoro.
Magigirumdumang nag-uli si Guarte nin pirang medalya sa mga sporting event na kinababalehan kan sarong gold medal kan 2023 SEA Games, bulawang medalya kan 2019, asin duwang silver medal kan 2011.
An mga naunambitang medalya an naguno kan atleta sa running events.
