Nagpaluwas nin pahayag an PhilHealth katakod kan viral post kan agom kan saro sa mga miyembro kaini na dae suboot natawan nin tabang para sa babayadan sa ospital makalihis magadan.
Segun sa viral post sa Facebook, uminabot nin P200,000 an hospital bill kan pasyente alagad sinabi suboot kan ahensya na ineligible sa nagkapirang benepisyo an nagadan huli ta na-confine ini nin wara pang 24 oras.
“We have since reached out to the member’s wife and have agreed on the next steps as we explore all avenues of support,” segun sa ahensya.
Nakikipag koordinar na man suboot an PhilHealth sa mga ospital na imbwelto ngani na maaraman an pangyayari bilang parte kan saindang padagos na pagsisikap ngani na mapakarahay an serbisyo asin pagtabang sa miyembro.
An pahayag kan ahensya an kasunod kan post ni Maria Lourdes Sulit, na nag-istorya kan sinapit kan saiyang agom na si Marvin na nagadan huli sa brain hematoma makalihis suboot na dae makabayad sa milyun-milyon na gastos para sa operasyon.
“May asawa ko na namatay na. Paano siya hindi qualified?” segun ki Sulit, na ipigduon na haloy nang miyembro asin regular na naghuhulog an saiyang agom sa PhilHealth.
Kan magpasiring ini sa Philhealth, dae suboot kwalipikado sa nagkapirang benepisyo huli ta dae uminabot sa 24 an pagkaka confine.
Nangapudan man siya sa PhilHealth na repasuhon asin halion an 24-hour confinement policy sa mga kasong nauli sa pagkagadan, na bako suboot makatarungan para sa pamilya na nawaran nin padangat sa buhay.
