Dae sierto si Philhealth President asin CEO Emmanuel Ledesma Jr kun papaboran kan Philhealth Board of Directors na tapyasan an mandatory premium contribution kan mga miyembro kaini.
Ini an sinabi ni Ledesma sa pagdangog kan Committees on Health and Demography asin Finance.
Maski na nagpahayag nin suporta si Ledesma sa ipigbubusol kan Senado na tapyasan an kontribusyon kan mga miyembro mananaig pa man suboot an desisyon kan Board.
Sa presente, nagtitindog na chairman kan Philhealth board si DOH Secretary Ted Herbosa asin vice chairman man si Ledesma.
Enot na suboot nagpahayag nin pagtutol si Herbosa na tapyasan an 5% mandatory premium contribution kan Philhealth members sa 3.25% dahilan kun niata dae pa sierto kun maisasakatuparan ini kan ahensya.
Mientrastanto, sinabi man ni Senador Christopher “Bong” Go, si Ledesma an nagtitindog na presidente asin pandok kan Philhealth kun kaya dakula an timbang na magiging rekomendasyon kaini sa board.
Pigkuwestyon man ni Go kun magtitinir na promesa na lang an pagrekomenda kay Presidente Ferdinand Marcos Jr sa pagtapyas sa kontribusyon.
Depensar ni Ledesma, irerekomendar niya ini sa presidente sa oras na tawan siya nin clearance kan Board of Directors.
Alagad kun dae suboot magtugot an Board an dae siya direktang makapagsasabi sa presidente.
Siring man, pigsierto ni Ledesma na padagos nindang pag-aadalan asin ipi-presentar sa bilog na board an pigbubusol na pagtapyas sa mandatory premium contibiution kan Phlhealth members.
