LEGAZPI CITY – Tiwala an mga petitioners na kakatigan kan Korte Suprema an pagkontra sa pagbabawal kan Metropolitan Manila Development Authority (MMDA) na maglaog an mga provincial buses sa EDSA.
Napag-araman na nagluwas nin desisyon an SC na pigpapasimbag an MMDA sa mga petisyon na ipigsunad kan nagkapirang kongresista hale sa Bicol asin Bayan Muna Party-list.
Sa intrevista kan Bombo Radyo Legazpi ki Ako Bicol Party-list Rep. Alfredo Garbin Jr., liwat na tinawang-duon kaini na unconstitutional an nasabing ban, iligal asin bakong makatawo na polisiya.
Segun ki Garbin, sampulong aldaw an ipig-alocar sa MMDA sa pagsimbag sa mga petisyon kun sain isusunod na an full-blown trial, oral argument asin pagpresentar kan opinyon kan duwang lado kun nata dae o dapat itugot an pagpapadagos kan ban.
Pighihiling ni Garbin na madidificilan MMDA sa pagdepensar kan argumento urog na sa enot pa sana aminadong wara na legal na basehan para sa lakdang.
Paliwanag pa kan kongresista na an lokal na gobierno asin Land Transportation, Franchising and Regulatory Board (LTFRB) sana an may direchos sa revocation kan prangkisa na ipig-iimply kan pagbabawal sa paglaog kan mga povincial bus.
Mientras tanto, pigpuna man ni Garbin an pagpahalipot kan ruta kan mga provincial bus kan LTFRB na saro suboot sa mga pighihiling na magigin komplikasyon.
