LEGAZPI CITY — (Update) Kinumpirmar kan Philippine Drug Enforcement Agency (PDEA) Albay na konsideradong high-value target (HVT) an mag-agom na naaprehender sa isinagibong search warrant implementation sa Purok 1 Barangay Puro sa ciudad kan Legazpi.
Sa intrevista kan Bombo Radyo Legazpi ki PDEA Albay Agent Enrique Lucero, haloy nang pigmomonitor sinda Manuelito, 48-anyos asin Gloria Jacobe, 47-anyos hasta sa pormal na ma-subject sa search susog sa inisyung warrant kan korte.
Napag-araman na dating drug surrenderer si Manuelito na enot naman na nakasuhan sa pag-imbwelto sa illegal drugs mantang on-and-off man an aktibidad kan esposa kaini.
Mientras tanto, kinalampag man kan opisyal an mga nagbabantay sa New Bilibid Prison makalihis na mapag-araman na hale pa sa nasabing karsel an ipigsusuplay kan duwa.
Aminado si Lucero na wara sindang kontrol sa pagmamarket kan mga bigtime drug lords sa Bilibid alagad bisto na suboot an pigkukuhaan nin suplay kan mga ini na napag-aramang taga-Legazpi man.
Pagbuyagyag pa kan opisyal na kadaklan sa mga ipigsusuplay sa ciudad an hale sa National Capital Region (NCR).
Kaibanan sa mga nakumpiskar sa mag-agom an poco mas o menos 25 gramo kan pigtutubudang shabu na may market value na P150,000 na nakatago sa likod kan TV siring man an nagkapira pang drug paraphernalia.
