LEGAZPI CITY- Pigpaplantsa pa kan Philippine Drug Enforcement Agency (PDEA) an gabos na plano asin lakdang antes na magsagibo nin mga panibagong anti-illegal drug operation.
Ini makalihis na halion sa Philippine National Police (PNP) an poder na magkundusir nin buy-bust operation asin mag-implementar nin search warrant.
Sigon ki Cotton Talento, tagapagtaram kan PDEA Bicol, enot pa sana, an ahensya na an lead agency pag-abot sa mga operasyon kontra iligal na droga kun sain nakikipagcoordinar man sana an PNP antes na magsagibo nin ano man na operasyon.
Sa ngunyan, nasa 87 drug personalities na an saindang naarestar puon kan magbukas an taon 2017 sa tabang kan PNP asin iba pang law enforcement agency.
1 suboot digdi an empleyado kan gobyerno, 1 an barangay kagawad asin 3 an nakumpiskaran nin darakulang volume nin droga.
Sinabi man ni Talento na matabang man giraray an kapulisan sa seguridad kan mga anti-drug ops.// Limitado sana kaya an saindang personahes kun sain igwa sana nin 36 para sa bilog na rehiyon.
Pigbubusol man suboot ni PNP Chief Director General Ronald Dela Rosa an pagpa-activate sa mga Barangay Anti-Drug Abuse Council (BADAC) ngani na maparikas an pagpuho sa iligal na droga.
