PCO, nagpatanid laban sa fake news katakod kan sitwasyon sa enerhiya

Nagpatanid an Presidential Communications Office (PCO) laban sa pagpalakop nin salang impormasyon na nag-aaprobetsar sa presenteng kamugtakan kan enerhiya sa nasyon.

Sa sarong pahayag ni PCO Secretary Dave Gomez, sinabi kaini na an sisay man na tuyong maggibo asin magpalakop nin fake news online an papanimbagon sa irarom kan ley.

Nagpagirumdom si Secretary Gomez na an pagpalakop nin “fake news” an may penalidad na maabot sa anom na bulan na pagkakakulong sa irarom kan Revised Penal Code.

Kun gigibuhon ini online, madoble an penalidad sa irarom kan Cybercrime Prevention Act.

Segun pa ki Gomez, an disinformation an nakakaraot kan tiwala kan publiko, nakakapaluya sa ekonomiya, asin nakakapeligro sa karahayan kan mga namamanwaan, urog na sa tahaw kan angat sa enerhiya.

Tinawang-duon kaini na dai mag-aalangan an gobyerno laban sa mga tuyong nagpapalakop nin salang impormasyon para sa personal o political na ganansya.

Ikokonsiderar suboot na seryosong pagbalgar an anuman na pagporbar na iligaw an publiko dapit sa seguridad, suplay, asin presyo kan enerhiya.

Sinabi pa kan Secretary na makikoordinar an PCO sa Department of Justice (DOJ) nganing magsangat nin kaso laban sa mga napatunayan na nagpapalakop nin mapanlinlang na impormasyon asin nagmamanipula sa merkado.

Pigpakusog man kan ahensya an pagmonitor kan social media asin iba pang mga information channels ngani na mabisto asin maibitaran an mga organisadong kampanya nin disinformation, sa pakikipagtabangan sa Oplan Kontra Fake News.

Inasegurar kan gobyerno an padagos na pagtao nin malinaw, eksakto, asin napapanahon na impormasyon dapit sa sektor nin enerhiya, kasabay kan pangapudan sa publiko na maglaom sana sa mga opisyal na report asin beripikado na datos.

Katakod kaini, nangapudan man si Secretary Gomez sa mga netizens na magin responsable sa paghiras nin impormasyon asin syertuhon na beripikado ini antes ipalakop ngani na maibitaran an posibleng danyos sa publiko.