LEGAZPI CITY-Ipig-orgulyo ni President Ferdinand Marcos Jr. an padagos na pagpakusog kan mga benepisyo, insentibo, asin suporta para sa mga paratukdo.
Ini an pahayag kan Presidente durante kan Teachers’ Day celebration ngonian na aldaw na ginibo sa Araneta Coliseum sa Quezon City.
Kabali digdi an World Teachers’ Day Incentive Benefit, na mareresibe kan mga paratukdo kada Oktubre 5, siring man an 2024 Performance Based Bonus, na pigpoproseso suboot ngonian kan gobierno.
Segun ki President Marcos, tinawan nin direksyon an mga kinauukulang ahensya na i-streamline asin padalion an proseso kan distribusyon kan bonus.
Sinabi man niya na an gobierno nagpakusog kan suporta para sa mga paratukdo sa paagi nin pagpahiwas kan mga career opportunities, pagbawas sa classroom observations, asin pagpapagian kan mga trabahong administratibo.
Pigsasabi na labing 82,000 na mga paratukdo asin mga school heads an na-promote man sa irarom kan Expanded Career Progression System.
Tinawan nin duon niya an importanteng papel kan mga paratukdo sa pagbilog kan kaaraman, disiplina, asin mga pamantayan kan mga jovenes.
Kasabay kaini, nasambit niya na pinapakusog kan gobierno an giya asin suporta sa mental health sa mga eskwelahan, siring man an mga lakdang laban sa bullying asin kadahasan.
Segun sa Presidente, magtetenir na prayoridad kan administrasyon an edukasyon asin an karahayan kan mga paratukdo.
