Pigsiyerto ni Presidente Ferdinand Marcos Jr. na warang papatawadon an gobyerno asin papanimbagon sa paagi nin ley an sisay man na mapatunayan na nagpabaya sa mga flood control projects, o nag-samantala kan kwarta kan publiko.
Sa teaser na pinaluwas kan PCO para sa Podcast interview kan Presidente, tahasang sinabi ni Presidente Marcos na maski kaalyado siya sa pulitika kan mapatunayan na igwa nin kapabayaan o pag-samantala an dae ini papabayaan kan administrasyon.
Kun magigirumduman sa State of the Nation Address (SONA) kan Presidente, pigsugo niya an Department of Public Works and Highways (DPWH) na magsumiter nin kumpletong listahan kan mga flood control projects kan nakaaging tolong taon.
Pigpapa-aram man kan presidente kun arin sa mga ini an dae pa tapos, hababa an kalidad, o ghost projects sana, asin tulos na ipapaaram sa publiko, nganing an mga kurakot, pabaya, o abusado an maipaluwas sa publiko.
Sinabi pa kan presidente na dapat may mapanimbag sa mga kadifisilan na inaagihan kan mga Pilipino tuyong ma-uran asin nagbabaha.
