LEGAZPI CITY- Pinagkakahaditan ngunyan na magresulta na naman sa panibagong paglangkaw sa presyo kan produktong petrolyo an naval blockade kan Estados Unidos sa Strait of Hormuz.
Segun ki Bicol University International Peace Studies Professor Dr. Herbert Rosana sa intrevista kan Bombo Radyo Legazpi na bako uyon sa international law an paglalaag nin blockade sa anuman na teritoryo.
Alagad aminado ini na magin an international law an garing ‘selective’ man sa pagpapaotob kan ley urog na sa mga poderosong nacion.
Marurumduman na tuyong igwang huma sa world economy, marikas na nagkakaigwa nin paglangkaw sa presyo kan langis, na posibleng magpalugmok na naman sa Pilipinas.
Sa presente sinabi ni Rosana na bako pa malinaw an mga kondisyon ni US President Donald Trump sa pagpapaagi sa Strait of Hormuz kaya difisil na mataram an epekto kaini sa nacion.
Alagad bilang sarong pobre asin sadit na nacion an Pilipinas, posible suboot na bako ini signipikante para sa Amerika.
Marurumduman na magka alyado an Pilipinas asin Estados Unidos, alagad sinabi ni Rosana na an enot na pagrani kan nacion sa Iran katakod kan pakiolay na makaagi an mga barko kan Pilipinas sa Strait of Hormuz an posibleng maka apektar sa sitwasyon.
