LEGAZPI CITY – Nanindogan an party-list coalition sa Kamara na wara pang napipili an grupo kan susuportarang lider sa House speakership post.
Bilang tagapagtaram kan koalisyon, sinabi ni Ako Bicol Party-list Representative Alfredo Garbin Jr., may mga kani-kaniyang preference an mga miembro kan Kamara asin pinag-aadalan pa kun siisay an magigin pinakamarhay na lider sa hibabang sanga kan Kongreso.
Alagad aminado an opisyal na ipigbaba na sana sa duwa an pagpipilian ninda.
Dugang pa ni Garbin na pighahalat man an pormal na magigin anunsyo ni Presidente Rodrigo Duterte sa dapat na suportahan.
Dae man maibitaran na isipon kan kongresista na may laman an mga karaw kan presidente na si House speaker Gloria Arroyo na sana an bahalang magpili kan ie-endorsar na masunod na lider kan Kamara.
Mientras tanto, inanunciar man ni Sen. Manny Pacquaio, tagapagtaram kan PDP Laban na partido kan presidente na si Marinduque Rep. Lord Allan Velasco an susuportaran kan partido sa nasabing posisyon.
