LEGAZPI CITY- Nasakote kan mga otoridad an sarong persona na nahahampang sa patong-patong na kaso sa Virac, Catanduanes.
Segun ki Police Major Emsol Icawat, hepe kan Virac Municipal Police sa intrevista kan Bombo Radyo Legazpi na nahahampang an akusado sa sarong count nin acts of lasciviousness, duwang kaso nin sexual abuse asin duwang kaso nin statutory rape.
Napag-araman na kan Abril pa ipigsunad an kaso alagad nahaluyan sa pagproseso sa korte.
Segun sa hepe na sarong persona man sana an biktima kan akusado.
Nagluwas sa inisyal na imbestigasyon kan mga otoridad na paratukdo an nasabing suspek sa Catanduanes State University.
Mientras tanto, sa suway na intrevista ki Catanduanes State University President Dr. Patrick Azanza, sinabi kaini na an nasabing suspek an dae na nagtutukdo sa nasabing unibersidad huli sa pagigin absent without official leave (AWOL).
