LEGAZPI CITY- Binawian nin buhay an sarong parasisira makalihis tamaan nin kikilat sa banwaan kan Magallanes, Sorsogon.
Segun ki Police Captain Edwin Dela Fuente, hepe kan Magallanes Municipal Police Station sa intrevista kan Bombo Radyo Legazpi na naglalawod an biktima kaibanan an saiyang aki sa katahawan kan mauran na panahon.
Digdi na suboot biglang tinamaan nin kikilat an biktima na rason kan pagkahulog sa piglulunadan na bangka.
Tulos man na nakuwa kan aki an hawak kan saiyang ama asin nadara sa pampang alagad dae na naisalbar pa.
Segun k Dela Fuente na puon kan magtukaw siya bilang hepe kan banwaan, ini an enot na bes na igwang tinamaan nin kikilat mantang nasa lawod.
Huli digdi, nagpagirumdom an opisyal sa mga parasisira na ibitaran muna an paglalawod tuyong maraot an panahon ngani na maibitaran an aksidente.
