LEGAZPI CITY- Arestado an sarong parasisira sa Barangay Abuyog, Sorsogon City na haloy ng nagtatago sa ley huli sa nakumitir na kaso.
Segun ki Sorsogon City Police Station spokesperson Police Captain Shirly de Ocampo sa intrevista kan Bombo Radyo Legazpi na nahahamang an nasabing suspek sa limang counts nin rape.
Wara man na piyansang pigrerekomendar para sa nasabing kaso.
Sa presente nasa kustodiya pa kan Sorsogon City Police an nasabing kaso asin pighahalat na mai-turn over sa Bureau of Jail Management and Penology.
An pagkaka arestar sa suspek an pigkokunsiderar kan opisyal na enot na lakdang para sa pagtutulod kan hustisya sa nagin biktima kaini.
Mientras tanto, sinabi ni De Ocampo na igwa pang nagkapirang mga kaso nin pang-aabuso sa ciudad kaya padagos an pagpapalakop nin impormasyon kan kapulisan sa komunidad ngani na matawan nin kumpiyansa an mga nagin biktima nin pang-aabuso ngani na magsumbong sa mga otoridad.
Aminado an opisyal na dae mahahali an stigma na nasusupog an mga biktima nin pang-aabuso na magsumbong kaya pig-eenganyar ninda na papanimbagon an mga nasa likod kan nasabing mga pang-aabuso.
Pigpapasabot man suboot kan mga kapulisan sa publiko na igwang ley na nagpo protehir sa mga kababaihan o magin sa mga kalalakihan na nabibiktima nin pang-aabuso.
