LEGAZPI CITY – Nagkaigwa na naman nin panibagong insidente nin overcharging nin pamasahe sa traysikel sa ciudad nin Legazpi.
Segun ki Legazpi City Public Safety Office head Octavio Rivero sa intrevista kan Bombo Radyo Legazpi na may nagdulok saindang mga pasahero makalihis na mabiktima nin overcharging kan magsakay ini sa sarong traysikel harani sa sarong sinehan.
Makalihis na makompirmar ninda an plate number asin numero kan Parada kan imbweltong behikulo an tulos ninda ining ipina-apod asin pinag-olay an ambos lados alagad dae na nagsunad pa nin reklamo an biktima huli sa hirak kaini sa driver .
Irigwa na suboot na nabiktima an nasabing driver alagad wara man nin nagkukusog boot na magreklamo nganing matawan man kuta an mga ini nin padusa asin penalidad.
Patanid man kan opisyal na enkaso utruhon giraray kan imbweltong driver an paniningil nin halangkaw na pamasahe an mauuli ini sa pagka-impound kan saiyang traysikel asin susunadan nin reklamo maski patawadon ini kan complainant o dae.
Abiso niya man sa pasahero na dae na pagpa-iralon an hirak nganing dae na mautro an serye nin overcharging asin nganing magsirbing patanid sa ibang pasahero.
Paglilinaw niya na piggigibo sana ninda an saindang trabaho nganing makapagtao nin maray na serbisyo sa saindang namamanwaan asin maximum tolerance an saindang pigsusunod maski nakakaresibio na sinda nin mararaot na taramon hale sa mga driver na nasisita ninda.
Pagirumdom ni Rivero sa mga driver na ibitaran an overcharging sa mga pasahero huli ta maski primerong bes pa sana an ginibo an dae ninda papalagpason an nangyari asin gigibuhon ninda an gabos nganing mapadusahan sana an abusadong driver.
