LEGAZPI CITY- Klinaro kan principal kan Pag-asa National High School, an billeting center kan mga delegado kan Naga an dapit sa insidente nin pangungulog kan tulak kan mga atleta.
Sigon ki Ricardo Llaneta, puga-puga an saindang pagbantay asin pag-estimar sa mga delegado kun sain 24 oras na naka-antabay an mga paratukdo ngani na masimbag an ano man na pangangaipo kan mga bisita.
Ipig-orgulyo pa kaini na sinabi kan saro sa mga coach na sa 21 taon kaini sa Palarong Bicol, ngunyan sana sinda nakaeksperyensya nin siring na pag-ataman gikan sa saindang mga billeting centers.
Mientrastanto, klinaro ni Llaneta na bako huli sa saindang catering service an nangyaring pangungulog kan tulak kan nagkapirang delegado huli ta nangyari ini kan mag-abot an mga ini sa syudad.
An mga sadiring balon suboot kaining pagkaon an nagkawsa kan LBM alagad sienerto kaini na bako kritikal an nagin kondisyon kan mga delegado.
Magigirumduman na maabot sa 200 an kinulugan nin tulak durante kan Palarong Bicol 2017 na nagpapadagos an mga sporting event ngunyan hasta sa Pebrero 10.
