LEGAZPI CITY – Ipigkokonsiderar nang “case closed” kan Virac Municipal Police Station an panggagadan sa paratukdong si Donn Carlos Bagadiong, 28-anyos sa residencia kaini sa Brgy. Valencia.
Sa intrevista kan Bombo Radyo Legazpi ki PCpl. Liza Millete, tagapagtaram kan Virac PNP, ipigpapasakamot na sa piskalya an pagdeterminar sa probable cause kan kasong Murder na ipigsunad sa 18-anyos na suspek na si Manuel Jose.
Nagtetenir man suboot sa kustodiya kan pulisya an nasabing suspek mantang pighahalat an iluluwas na commitment order kan korte.
Mientras tanto, duwang testigo man an nakaresibe kan ipigpromesang reward money na P100, 000 makalihis na direktang maitukdo an suspek.
Magigirumduman na hale sa provincial government an nasabing pabuya na ipig-ofrecir para sa marikas na pagkakaresolber kan kaso.
