LEGAZPI CITY- Labi an kamunduan sa ngunyan kan pamilya kan saro sa duwang overseas Filipino Worker na nagadan sa gas leak explosion sa Sheikh Rashid Bin Seed Road o bisto na apod sa Airport Road sa Abu Dhabi kan Agosto 31.
Sa intrevista kan Bombo Radyo Legazpi ki Rachel Bartoces, tugang kan nagadan na OFW na si Merriner Bartoces, sarong cashier an biktima sa nasabing nasyun asin kataning sana kan nagsabog na gas tank kung kaya dae nakasalbar sa insidente.
Mamundong pigheras ini Rachel na antes pa man an insident, nakapapadara pa nin kwarta asin nakapangumusta pa sa saindang pamilya an OFW na excited na suboot na makauli sa nasyun huli ta matatapos na an duwang taong kontrata.
Segun pa kay Rachel, pangaturogan talaga kan saiyang ate na makapag-migrate sa Canada asin tabangan sinda na makapagtapos sa pag-aadal asin mag-asenso sa buhay.
Alagad dai na suboot ini maootob sa ngunyan huli sa biglaan na pamamaaram kan 25-anyos na OFW.
Sa ngunyan, pinaghahalat pa kan Pamilya Bartoces an pag-uli sa bangkay kaini mantang hagad man na matawanan nin hustiya an pagkagadan kan OFW asin mapanimbag kung sisay man an nakagibo nin kapabayaan na nauli sa pagsabog.
