LEGAZPI CITY- Kumpiyansa an matuang tugang kan ginadan na si Ako Bicol Party-list Representative Rodel Batocabe na magigin makabuluhan an maitataong servicio-publiko kan biyuda kan lehislador en kaso pormal nang magdalagan sa mayoralty race sa Daraga, Albay.
Sa intrevista kan Bombo Radyo Legazpi ki Dennis Batocabe, napag-olayan suboot sa pamilya na si Gertie Duran-Batocabe an magribay sa nawalat na posisyon kan agom urog na naka-eksperyensya naman suboot ini kan mga political affairs.
Napag-araman na aktibo man si Gertie sa pagbale sa mga proyektong ipiglulunsar kan organisasyon kan mga agom kan kongresista sa Kamara, segun ki Dennis.
Klinaripikar man ni Dennis na mas angay na magin substitute candidate an esposa kan tugang na komon man na nangyayari sa ibang kandidatura na nahampang sa kaparehong sitwasyon.
Dawa na kasabay sa pinagpilian na magribay sa tugang para sa pagdalagan, makonsentrar na sana suboot si Dennis sa negosyo kaini asin matao kan bilog na suporta sa hipag.
Magtetenir man an pangaran kan kongresista sa balota dawa pa substitute candidate na an madalagan.
Mientras tanto, enot naman na klinaripikar kan aki kan lehislador na dae pang pinal na desisyon an ina sa pagdalagan sa mayoralty race sa Daraga asin apelar na halaton na sana an bubutasan kaining opisyal na pahayag.
