LEGAZPI CITY—Nagkundusir an grupong Pambansang Lakas ng Kilusang Mamamalakaya ng Pilipinas (PAMALAKAYA) nin protesta sa National Capital Region Bilang parte kan pagselebrar kan National Fisherfolk’s Day.
Segun ki PAMALAKAYA Chairperson Ka Pando Hicap, sa intrevista kan Bombo Radyo Legazpi, saro sa mga nagin pangapudan ninda sa administrasyong Marcos an pagbasura sa pagtugot sa mga commercial fishing vessels na yaon sa laog kan 15-kilometer municipal waters.
Huli sa nasabing isyu, dae na kayang makipagkompetensya kan mga saradit na parasisira sa mga naunambitang commercial fishing vessels kun saen nakakaapektar man ini sa pagbawas sa produksyon kan pagsisira sa nacion.
Kun kaya saro ini sa pangapudan kan grupo na dapat nigaran kan Korte Suprema an desisyon na pagtugot sa rason na dae ini makakatabang sa pagsustenir nin maray na suplay nin mga produktong sira.
Pangapudan man ni Hicap sa mga kapwa parasisira na mag-organisar asin maggibo nin aksyon o petisyon na may kinaaraman sa pagbasura sa pagtugot sa mga commercial fishing sa laog kan 15-kilometer municipal waters asin ideklara na an fishing ground na dapat magin eksklusibo sana para sa mga saradit na parasisira kan nacion.
