LEGAZPI CITY – Welcome development para sa pamayo kan ciudad kan Legazpi an pagsasaley kan Republic Act 11292 na nagi-institutionalize sa Seal of Good Local Governance (SGLG) para sa mga local government units (LGUs).
Sa ekslusibong intrevista kan Bombo Radyo Legazpi ki Mayor Noel Rosal, mao-obliga suboot an mga LGU na magperform nin marhay asin magcomply sa rekisitos, bako sana para sa honra kundi para sa makukuang beneficio kan mga empleyado asin grants sa lokal na gobierno.
Nakapalaman man suboot sa SGLG an scorecard na compuesto kan pagsimbag sa isyu sa peace and order, investments, paggamit kan 20% development fund, ecological solid waste management asin iba pa kun sain ‘very aware’ na suboot an pigsisirbihang ciudad.
Napag-araman na sa maabot na Oktubre, nakatalaang resibihon man kan ciudad an ikaapat nang honra sa bilang saro sa mga nangengenot sa SGLG sa bilog na nasyon.
Inorgulyo pa ni Mayor Rosal an esfuersos kan mga empleyado kun kaya taunang nakakaresibe nin dugang na labi sa P5 million pondo na dae na kaipuhang magkua sa local government fund.
Segun pa sa alkalde, dae naman pwede sa irarom kan nasabing ley an mga local chief executives na “turog-turog” urog na pwedeng mawalat an mga ini asin matawanan pa nin penalidad kun dae maghiro.
