LEGAZPI CITY- Nagpahayag nin pagkahadit an grupo nin mga paraoma na samantalahon na naman kan mga traders an anunsyo kan gobierno na pagpapabakal nin P20 kada kilo nin bagas sa Visayas.
Paliwanag ni Bantay Bigas Spokesperson Cathy Estavillo sa intrevista kan Bombo Radyo Legazpi na dakula an posibilidad na baraton na naman kan mga traders an presyuhan kan paroy huli ta gigibuhong rason an hibabang presyuhan nin bagas.
Ipig-aagrangay man kan nasabing grupo an nagkapirang semana nang pagbakal sa bagong ani na paroy sa kantidad na P14 kada kilo.
Katakod kaini, inagyat kan opisyal an gobierno na magpaluwas nin price ceiling sa presyo kan paroy na dae mababa sa P21 kada kilo.
Segun ki Estavillo na baon na sa utang an mga paraoma huli sa labing paglangkaw kan gastos sa pagtatanom asin epekto kan mga nakalihis na kalamidad.
Mientras tanto, nangapudan man ini na ipundo na an land use conversion ngani na dae na maagrabyado an mga paraoma.
