LEGAZPI CITY – Nagin matuninong an pagpapaotob nin Comelec Checkpoint kan Sorsogon Police Provincial Office mapadapit sa paparaning 2025 National asin Local Election.
Segun kay Sorsogon PPO Spokesperson Police Major Arwin Destacamento sa intrevista kan Bombo Radyo Legazpi na nagkaigwa nin simultaneous checkpoint kasubagong maagahon nganing maipaotob an pazy orden kaiba an mga election officer kan kada munisipalidad asin mga law enforcement agency sa Sorsogon.
Nagin magayon man suboot an pagpapaotob nin checkpoint nin huli ta bago kaini an nagkaigwa na sinda nin pirang serye nin orolay nganing maisapinal asin mailatag an saindang mga plano.
Dae man nagin ulang sa isinagibong checkpoint an namamatean kan provincia na mga pag-uuran na dara kan shearline.
Pigtawan doon man kan opisyal na sa ibong kan pagtatao nin seguridad sa publiko, dapat man giraray na makaboto an mga kapulisan sa paagi kan absentee voting nin huli ta karapatan man ninda ini bilang sarong botante.
80 porsyento kan saindang kapulisan sa provincia an nakadeploy sa mga election checkpoint nganing mabugtakan kan saindang presensya an mga saradit asin hararayong barangay sa saindang lokalidad.
Pigmomonitor na man ninda an mga banwaan asin munisipalidad sa provincia na naideklarang election hotspot kan nakaaging taon alagad mga hanay man sana kan mga suportadores suboot an nagkaka-initan asin bako mga politiko na kalimitang normal na nangyayari kada masapit an pirilian.
Mas lalo nindang papahiguton an seguridad ngunyan na nagpoon na an election period sa bilog na Pilipinas asin wara man sindang nahihiling na huma alagad mantinidong nakasubaybay an saindang hepatura nganing mamantenir an maray na bulos kan sistema sa Sorsogon.
Pakiolay ni Destacamento sa mga motorista na maki-kooperar nin huli ta diit man sanang abala ini nganing masyerto an kaligtasan kan gabos asin wara man suboot na mangyayari sa sarong tawo kun wara man ining pigtatago.
