LEGAZPI CITY- Pinagbubusol sa ngunyan kan Department of Energy (DOE) an posibleng pagpapalangkaw na sa maximum capacity kan mga pasahero ngani na mabawasan an kalbaryo na pinag-aagihan sa ngunyan kan mga tsuper huli sa sunod-sunod na paglangkaw sa presyo kan produktong petrolyo.
Sa intrevista kan Bombo Radyo Legazpi kay Rino Abad kan Director kan Oil Industry Management Bureau kan DOE, nakikipag-ulay na an ahensya sa Inter-Agency Task Force para sa nasabing lakdang kung sain hali sa presenteng 50% sana na maximum capacity posible suboot na gibohon na ining 70% hasta 100%.
Ipinaotob an 50% na maximum capacity sa mga sakayan bilang parte kan health protocol kontra sa paglakop kan COVID 19.
Apwera sa pagpapalangkaw sa numero kan pasahero, pinag-aadalan man kan DOE an pagpapalawig hasta Disyembre kan diskwentro sa krudo na pigtatao kan mga oil companies na nakatalaan ng matapos ngunyang Oktubre 31.
Napag-araman na epekto an magkakasunod na big time oil price hike kan paglangkaw sa demand kan produktong petrolyo sa Pilipinas asin iba pang mga nasyun kasabay kan pagbubukas na kan ekonomiya na naapektaran kan pandemya.
Kadaklan man suboot sa mga plante sa China asin Europe an naggamit na nin liqued gas para sa saindang mga planta makalihis an pagmahal sa piggagamit na coal asin fossil fuel.
