LEGAZPI CITY-Nanindugan an Bangko Sentral ng Pilipinas (BSP) na bako enterong nakakaraot sa ekonomiya kan nacion an pagluya kan palitan kan piso kontra sa dolyar kan Estados Unidos, huli ta nakakatabang suboot ini sa nagkapirang pangenot na sektor.
Segun ki BSP Governor Eli Remolona Jr., pabor sa current account deficit asin export sector kan Pilipinas an presenteng estado kan currency na ngonian lagpas na sa P60 an marka.
Magigirumduman na nairehistro an all-time low na P60.30 kada dolyar kan Marso 23, tulong semana makalihis na direktang maimbuelto an Estados Unidos sa gera.
Sa presente, nagtetenir sa palibot kan P60.23 an huli sa halangkaw na demand sa dolyar asin naglalangkaw na presyo kan langis sa pankinabang merkado.
Sa ibong kan pagbaba kan kantidad kan piso, nagseserbi ining cushion o pangulang para sa mga pamilya kan mga Overseas Filipino Workers (OFW).
Huli sa mas halangkaw na palitan, mas dakula an kantidad kan mga remittance na nagtatabang ngani balansehon an panluwas na pondo kan nacion.
Nagigin mas kompetitibo man an mga serbisyong dai naglalaom sa mga pig-aangkat na materyales, partikular an business process outsourcing asin turismo.
Alagad, naeeksperyensyahan man an ibang namamanwaan an mga negatibong epekto kaini.
An mas maluyang piso, nagpapalangkaw sa kantidad kan mga import arog kan petrolyo, pagkakan, asin suplay kan kuryente na nagreresulta sa inflation asin direktang nagpapababa sa purchasing power kan mga Pilipino.
