LEGAZPI CITY – Nag-abiso an Sorsogon Provincial Health Office sa publiko na magin malinig sa hawak asin sa palibot ngani na makaibitar sa mga helang na dara kan pagbabago ni klima o climate change.
Segun ki Health Education & Promotion Officer Ms. Regina Gonzalgo, uso sa siring na panahon an mga mosquito borne deseases siring kan dengue, chikunggunya asin zika virus.
Dugang pa kan opisyal na kinakaipuhan man na likayan an mga water borne disease siring kan cholera, typoid fever asin ibapa na nakukua sa mga kontaminadong tubig asin maating pagkaon.
Katakod mkaini, pig-abisuhan ni Gonzalgo an publiko na ugalion na maghugas nin kamot antes asin makalihis na magkakan asin magbanyo.
Dapat man na siertohon na malinig an pinaghahandang pagkaon asin lugar na piglulutuan kaini.
Segun pa kay Gonzalgo dapat man na haleon an mga bagay na posibleng lagduan o estaran nin lamok siring kan mga daeng taklob na bote, plorera, goma kan sasakyan asin iba pa.
Ngani na makalikay sa mga nasambit ng helang, segun sa opisyal dapat na manteniron an proper hygene, pagmantenir sa healthy lifestyle, pag-inum nin sufecienteng tubig, pag-eehersisyo asin tamang oras nin pagturog.
Tinawan nin doon kan Health Education & Promotion Officer na madaling maolakitan nin manlaenlaen na helang an mga personang may maluyang resistensya orog na an mga aki asin mga gurang.
