LEGAZPI CITY – Mantenidong pigpapa-otob kan Coast Guard Station Catanduanes an sea travel advisory sa northern and eastern coasts kan provincia huli sa epekto kan northeast monsoon o amihan.
Segun ki Coast Guard Station Catanduanes Chief of Staff Ensign Jepril Bitas, sa intrevista kan Bombo Radyo Legazpi na ipinagbabawal an paglalawod kan mga saradit na behikulong pandagat sa mga banwaan kan Bato, Baras, Gigmoto, Viga, Panganiban, Bagamanoc, asin Pandan.
Sa irarom man suboot kan advisory, pigsusugo an mga operator asin tripulante na magtenir sa mga pantalan o maghanap nin paramientras na masisirungan.
Sa ibong kaini an nagtetenir na normal an byahe sa mga pantalan kan San Andres asin Virac na rason kun kaya wara sindang nairehistrong stranded passengers huli sa raot nin panahon.
Pagsyerto man ni Bitas sa publiko na padagos sindang nakabantay asin nakikipagkoordinar sa manlain-laing ahensya kan gobierno nganing masyerto an kaligtasan kan mga parasisira asin biyahero sa tahaw kan mamateang epekto kan northeast monsoon sa Catanduanes.
