Pagkakarekober sa nasa P3.4M na ‘shabu’, pinakadakulang akomplisyemento kan Albay PNP ngonian na taon- spokesperson

LEGAZPI CITY- (Update) Ipigkokonsiderang pinakadakulang akomplisyemento kan Albay Police Provincial Office sa ngonian an pagkakarekober kan nasa P3.4 million na kantidad kan pigtutubudan na shabu sa laog kan residencia ni Cepfriano Tolarba Narciso, alyas “Pani” sa Brgy. Tuburan, ciudad kan Ligao.
Sa intrevista kan Bombo Radyo Legazpi ki PC/Insp. Arthur Gomez, tagapagtaram kan Albay PPO, resulta suboot an nasabing operasyon kan pagtatarabangan sa pagultanan kan Ligao City Police, Philippine Drug Enforcement Agency (PDEA) asin Provincia Intelligence Branch kan PNP.
Nagpalyar man an mga otoridad na madakop an mga target kan operasyon na sinda “Pani” asin saro pang drug personality na si Marvin Marmol.
Mientras tanto, nadakop man sa nasabing operasyon an katorseng indibidwal kaibanan na an rank number 6 sa Drug Watchlist kan ciudad na si Elmer Ramirez asin iba pa na sinda Gina Salanga, Jaime Marilag, Renato Rabacal, Jake Mella, Elias Samson, Dennis Sarte, Jorge Sabillena, Michael Joseph Tibayan, Arvy Rayela, Nolan Moises, Paul Art Palima asin Ruben Merjudio.
Aldaw nin Domingo kan marekober an nasa apat na sachet nin shabu na uminabot sa saronbg kilo asin narekobar pa sa sarong operasyon an poco mas o menos cincuentang gramo na nagkakantidad nin P180,000.
Dugang pa kan opisyal na nasa newly identified personalities an konsentrasyon ninda sa ngonian asin dagos-dagos pa an ipiglulunsar na mga operasyon na target an darakulang suspek na nagdadara nin kilo-kilong iligal na droga.
Sa ibong na lado, inako man kan opisyal na nadidipisilan sinda ngonian sa pagdedeklara kan nasabing ciudad siring man kan ciudad kan Tabaco na klarado na sa presensya kan droga kasabay kan paghahayag na nasa setenta y cinco porsyento pa sana an cleared sa ciento cincong barangay na nasa listahan kan PDEA.
Dipisil man suboot na basta na sanang ianunsyar na drug cleared na an sarong barangay.