LEGAZPI CITY – Nagsasagibo na nin lakdang an gobierno lokal kan ciudad kan Legazpi nganing masulusyunan an pagdakol kan presenysa kan mga nagbabalagaw-bagaw na mga badjao sa mga kakalsadahan na nagtataong huma bako sana sa sainda kundi pati na man sa publiko.
Segun ki Legazpi City Public Safety Office head Octavio Rivero sa intrevista kan Bombo Radyo Legazpi na kabale sa ipiglatag na plano iyo an pagpapa-uli sa mga badjao sa saindang residensya na napag-araman na mga taga-Zamboanga City kun sain sasaguton an pamasahe kan lokal na gobierno asin kan Department of Social Welfare and Development.
Mawot nindang mabawasan an mga insidenteng pigkaka-imbweltuhan kan mga nagbabalagaw-bagaw na mga badjao kun sain an iba sainda an nagigin bayolente na base sa mga nairehistrong reklamo na hale sa mga residentes.
Pighayag pa niya na sa presenteng panahon kaya an lakop na an mga badjao sa ciudad kun sain may mga naka-istar na sa mga barangay partikulamente na sa Barangay Gogon asin Barangay Bitano kun kaya mawot ninda ining ka-olayon asin enganyaron na magbalik sa saindang lugar.
Pigtaram pa kan opisyal na basado man sa saindang naguno na impormasyon an nagluluwas na may tawong nagkukuwa o nagre-recruit sainda hale sa Zamboanga asin pigdadara sa ciudad kan Legazpi nganing mamalimos.
Pigdoon man ni Rivero na dae dapat pigtatawan an mga namamalimos na mga badjao huli ta may ipigpapa-otob na polisiya sa ciudad na bawal an pamamalimos alagad may mga insidente na napipiritang magtao an publiko huli sa bayolenteng gawi kan mga ini.
