LEGAZPI CITY – Nagcausa nin pagkalibong sa mga biyaherong pasiring sa Masbate an bagong travel protocols na ibinaba kan Inter-Agency Task Force.
Susog kaya sa IATF Resolution No. 101, dai nang pigmamandato an pagtatao nin medical certificate asin travel pass siring man an quarantine, sa paglaog sa sarong lugar afuera na sana kun nahilingan nin mga sintomas.
Alagad segun ki MDRRMO Pioduran head Noel Ordoña sa intrevista kan Bombo Radyo Legazpi, dakol an na-stranded kutang mga biyahero pasiring sa Masbate huli sa kawaran nin certificate of acceptance.
Dai man kaya gabos na lokal na gobierno an nagtubod sa lakdang siring na sana kan Masbate City na naghahagad man giraray kan mga dating rekisitos.
Nakasarado asin sa Marso 14 pa liwat na maresibe nin LSIs an banwaan kan Mandaon asin Uson mantang required man giraray an pagpresentar nin RT-PCR test sa mga mauli sa Cawayan.
Nakipagcoordinar naman si Ordoña sa mga counterparts sa mga LGU sa nasabing island province asin paliwanag kan mga ini, importante man giraray an certificate of acceptance.
Paliwanag man kan nasabing mga LGU, padificilan an pagsabat sa mga biyahero urog pang bako pa stable an pampublikong transportasyon mantang igwa man na LSIs an dai pa tapos sa quarantine.
