Sinabi kan Embassy of China in Manila na nagkaigwa nin positibong progreso sa orolay kan Pilipinas asin China dapit sa posibleng joint oil asin gas sa South China Sea.
Segun sa embahada, nagkaigwa nin hararom na diskusyon an duwang nasyon manungod sa posibleng joint development sa pinag-iiwalan na katubigan.
Idinoon man kaini na an pagsasantabi sa mga pagkakaiba asin pagtutok sa kooperasyon an importante sa pagmantenir kan katoninongan asin katatagan sa rehiyon.
Alagad, piglinaw kan Department of Foreign Affairs na sa presente wara pa nin actual joint exploration na piggigibo, alagad posibleng mangyari ini sa maabot na panahon, segun ki Maria Theresa Lazaro.
Dati nang nagpahayag si Pres. Ferdinand Marcos Jr. kan saiyang kagustuhan na buksan liwat an negosasyon sa China para sa sarong joint energy project.
Nagtetenir na sensitibo an bagay na ini huli sa mga isyu nin soberaniya, limitasyon sa konstitusyon, asin magkakapatong na mga pag-angkin nin teritoryo, kabali na an West Philippine Sea.
Kan Enero 2023, pinawarang-bisa Korte Suprema kan Pilipinas an Joint Marine Seismic Undertaking (JMSU) na imbuelto an Pilipinas, China, asin Vietnam, pagkatapos na napag-araman ini na labag sa Konstitusyon huli ta tinugutan kaini an mga dayuhan na kumpanya na magsagibo nin eksplorasyon sa mga natural na yaman kan nasyon.
Maroromdoman na kan 2016, nagpaluwas nin desisyon an Permanent Court of Arbitration sa The Hague na pabor sa Pilipinas asin sinabi kaini na warang legal na basehan an mahiwas na pag-angkin kan China sa South China Sea, sarong desisyon na dai pigbibisto kan China.
