Nagpuon na an pagboto kan nasa 133 cardinal para sa pagpili kan bagong Santo Papa.
Alagad dae pigpapaluwas kan Holy See an eksaktong kantidad kan gastos sa historikal na aktibidad na ini, pinag-aantisiparan na nangangaipo ini nin milyun-milyong euro, na dakulang pasanin sa naluluging pinansyal kan Vatican.
Puon kan namaaram si Pope Francis kan Abril 21, labi sa 200 cardinal hali sa manlain lain na parte kan kinaban, kaibanan an saindang pagkaon, istaran asin transportasyon an pigtatagamahan urualdaw.
Kan 2013 conclave, pigkakarkulong nasa €4.5 million o P280 million an kantidad kan nagastos sa seguridad asin transportasyon, segun ki dating Rome mayor Gianni Alemanno.
Ngunyan na taon, nagtagama an administrasyon ni Prime Minister Giorgia Meloni nin pangenot na €5 million makalihis an pagkagadan ni Pope Francis, alagad wara pang pigpapaluwas na kabilugan na gastos.
Kun pagbabasehan an nakalihis na mga datos, an funeral asin conclave para ki Pope John Paul II kan 2005 an uminabot sa €7 million.
Ngunyan na taon, wara man na ipighayag na sponsors o pribadong pondo an naglaog sa Vatican.
Segun ki Vatican spokesperson Matteo Bruni na an gabos na gastos an hali sana sa pondo kan Holy See.
Sa ibong kan reporma ni Pope Francis na linigon an pinansyal kan Simbahan siring kan pagkrear kan Secretariat for the Economy kan 2014 asin pagpundo kan kaduda-dudang account sa Vatican Bank, nagtetenir na agyat an pinansyal kaini.
Kan 2022, pigkakarkulo na igwa pang deficit na €30 million an Simbahan huli sa nagbababang donasyon hali sa mga mananampalataya.
