Gadan na an 54-anyos na padre de pamilya na may helang na suboot epilepsy asin presenteng pigbubulong makalihis na inatake kan saiyang helang bago mahulog sa dagat kun sain sinda nagsisira sa Brgy. Dapdap, Tangalan, Aklan pasado alas 2:00 nin hapon kan Miyerkules, Hulyo 23.
Nagluluwas sa imbestigasyon na nangyari an insidente mantang nagsisira an biktimang si Rex Makiling na residente kan Brgy. Tondog, Tangalan.
Pigtutubudan na bigla na sana siyang nagkaigwa nin helang na epilepsy asin nahulog sa tubig, rason kan saiyang pagkalamos.
Makalihis an haros apat na oras na search and retrieval operations, nakuwa an saiyang bangkay sa irarom kan tubig poco mas o menos alas 7:10 nin bangi kan Miyerkules.
An saiyang bangkay dinara sa sarong punerarya sa lugar.
Mga sarong metro sana an rayo kan saiyang bangkay hale sa saiyang nahulogan.
An kapwa niya parasira sa ibong na sakayan nagporbar suboot na tabangan siya, alagad huli sa makusog na alon, dae niya kinaya kun kaya lugod naghagad ini nin tabang sa mga awtoridad.
Tulos man na nagkondusir nin search and rescue operation an mga miembros kan MDDRMO-Tangalan, PDRRMO-Aklan, Philippine Coast Guard, Bantay Dagat, asin iba pang diver volunteers.
