LEGAZPI CITY – Nagpromesa an National Housing Authority (NHA) sa gobyerno probinsyal kan syudad kan Tabaco na magtatao nin P800 million para sa pagkonstruhir kan maabot sa 4,000 na mga harong na nadanyaran kan Bagyong Nina sa nagkapirang lugar sa Albay.
Kan nakalihis na taon, nakabakal na nin 21 hektarya nin daga sa Barangay San Vicente kun sain an itutugdok na harong an nagkakantidad nin P200,000 kada saro.
Napag-araman man na sa parte kan local government para sa nasambitan na proyekto, igwang 40 hectares na daga na naipreparar si NHA Bicol Director Albert Perfecto.
Katakod kaini, pighayag ni Tabaco City Mayor Krisel Lagman-Luistro na bukas an syudad na itagama an mga kataraid na daga para sa dugang na 15 hektarya na kinakaipuhan sa nasambitan na programa.
Marurumduman na enot na man na nagpaabot nin asistensya an Department of Social Welfare and Development (DSWD) sa mga residentes na nadanyaran an mga harong huli sa bagyo sa paagi kan saindang Emergency Shelter Assistance (ESA) kun sain sinierto kan ahensya na dae ini makaka apektar sa pagpili kan priority resettlement beneficiaries.
