LEGAZPI CITY- Pinag-aadalan pa suboot ni Presidente Rodrigo Duterte an pag-aprubar sa P500-monthly cash subsidy para sa mga minimum wage earners na parte kan request kan labor groups sa pinakahudyan na dayalogo sa presidente.
Segun ki Labor Secretary Silvestre Bello III, ipigrekomendar kan mga grupo an nasabing lakdang bilang dugang-suporta katakod kan piglalaomang balik kan Tax Reform for Acceleration and Inclusion (TRAIN) Law sa mga obrero.
Target ining i-pattern sa conditional cash transfer kan Department of Social Welfare and Development (DSWD) kun saen bulanan na nakakaresibe nin assistance an mga pobreng kahimanwa.
Napag-araman na nasa apat na milyon kan mga minimum wage earners sa nasyon an mabebenipisyaran kaini en kasong maaprubaran alagad inako man ni Bello na kakabit kaini an dakulang pondo na itatagama.
Mientras tanto, kinontra man ni Bello an mga nagsasabing epekto kan pagpasar sa Tax Reform for Acceleration and Inclusion (TRAIN) Law an haros maginibong na paglangkaw sa presyo kan mga barakalon huli sa naghihiro man talaga suboot ini kun igwang paglangkaw sa presyo sa world market.
