LEGAZPI CITY- Nagpapadagos an validation na pigsasagibo kan Department of Agriculture sa danyos na winalat kan nakalihis na bagyong Enteng sa Bicol.
Segun sa intrevista kan Bombo Radyo Legazpi kay Lovella Guarin, an tagapagtaram kan Department of Agriculture Bicol, basado sa saindang initial validation damage assessment, nag-abot na sa P315 million an kabiluhang danyos sa agrikultura.
Kadaklan suboot an nadanyaran iyo an mga tanuman nin paroy partikular na sa probinsya kan Camarines Sur.
Apektado an nasa 13,623 na mga paraoma asin parasisisra sa bilog na rehiyon kun saen nasa 33 million an kabiluhan na kantidad kan danyos kan mga produktong pang agrikultura.
Dugang pa kan opisyal na sa Cam Sur nakapagrehistro nin 8, 513 hectares kan parayan an nadanyaran mantang sa Albay naman igwang 361 na ektarya kan mais asin 19 ektarya kan mga high value crops an apektado kan nasabing bagyo.
Sa kabilugan, igwang totally damage sa parayan na maabot sa 3,077 ektarya mantang an partially damage naman an nag-abot sa 5,400 hectares.
Alagad pigsierto kan opisyal na bastante man liwat an suplay nin bagas sa rehiyon huli ta 1% lang suboot ini sa pinaglalaoman na aanihon kan mga paraoma.
Mientrastanto, preparado man an DA sa pagtataong asistensya sa mga apektadong paraoma kun saen igwa sindang nakahanda na seed buffer stock na ipapanao sa mga paraoma.
Pangapudan man kaini sa mga paraoma na imantinir an pagiging preparado lalo na ngunian na ber months huli sa mga pinaglalaoman pa na mga maarabot na kalamidad.
